अमेरिकी राष्ट्रपति डोनाल्ड ट्रम्पले आगामी दुई हप्तामा युक्रेन युद्धको शान्तिपूर्ण समाधानतर्फ ठोस प्रगति नभए रुसमाथि कडा प्रतिबन्ध वा कर लगाउने ठूलो निर्णय लिने चेतावनी दिएका छन् ।
अगस्ट १५ मा अलास्कामा रुसी राष्ट्रपति भ्लादिमिर पुटिनसँग भेट भएको एक सातापछि ट्रम्पले शुक्रबार कडा चेतावनी दिएका हुन् । ‘म चाँडै निर्णय गर्नेछु । यो धेरै महत्त्वपूर्ण हुनेछ, चाहे त्यो ठूलो मात्रामा प्रतिबन्ध होस्, कर होस् वा दुवै,’ ह्वाइट हाउसमा पत्रकारहरूसँग कुरा गर्दै ट्रम्पले भने ।
उनले युक्रेनमा हालै एक अमेरिकी कारखानामा भएको रूसी आक्रमणप्रति आक्रोश व्यक्त गरेको बीबीसीले जनाएको छ । आक्रमणबाट कारखानामा आगलागी भएको थियो र धेरै कर्मचारी घाइते भएका थिए ।
‘म यसबाट खुसी छैन, न त युद्धसँग सम्बन्धित कुनै पनि कुरामा,’ उनले भने, ‘रूस-युक्रेन युद्धमा जे भइरहेको छ त्यसबाट म खुसी छैन । यो कुन दिशामा जान्छ भन्ने कुरा अर्को दुई हप्तामा स्पष्ट हुनेछ ।’
ट्रम्पले रुसी राष्ट्रपति पुटिन र युक्रेनी राष्ट्रपति भोलोडिमिर जेलेन्स्की बीचको प्रत्यक्ष भेटघाटको पनि वकालत गरे । ‘म चाहन्छु कि दुई नेताहरूसँगै बसून्। यदि उनीहरूले यसो गरेनन् भने यो किन भयो भनेर हेर्नुपर्नेछ,’ उनले भने ।
उनले आफ्नो कार्यकालमा सात युद्धहरू रोकेको र तीन सम्भावित युद्धहरू टारेको दोहोर्याए ।
यसअघि अगस्ट १८ मा, राष्ट्रपति जेलेन्स्की युद्ध अन्त्य गर्ने प्रयासहरूबारे छलफल गर्न युरोपेली नेताहरूसँग ह्वाइट हाउस पुगेका थिए। जेलेन्स्कीलाई भेटेपछि ट्रम्पले पुटिन-जेलेन्स्की बैठक हुने बताइएको थियो । तर, अहिलेसम्म पुटिन-जेलेन्स्की वार्ता पनि निश्चित छैन ।
अगस्ट १५ मा अलास्कामा ट्रम्प र पुटिनबीच भएको शिखर सम्मेलन र त्यसपछि ह्वाइट हाउसमा भएको वार्तापछि पनि रूस र युक्रेन युद्धविराममा सहमत हुन सकेका छैनन् ।
